စိတ်ခြောက်ခြားနေသူ ဒုက္ခသည်များ ရေနှင့် လေကို ကြောက်နေကြ

မင်းခက်မောင်
စနေနေ့၊ မေလ 17 2008 18:24 - မြန်မာစံတော်ချိန်

ကွမ်းခြံကုန်း - “အပြင်မှာ လေတွေ တိုက်နေသမျှ၊ ကောင်းကင်ကြီး တခုလုံး မှောင်မဲနေသမျှ၊ အမေ့ကို အပြင်ကို မထွက်ခိုင်းပါနဲ့ သားတို့ရယ်” ဟု မျက်ရည်များ စိုရွှဲနေသော ဒေါ်ဖွားစိန်က အကူအညီပေးရေး လုပ်သားများကို အသံတိမ်တိမ် အက်ကွဲနေသော အသံဖြင့် ပြောသည်။

သူမသည် အိုးမဲ့အိမ်မဲ့ ဖြစ်သွားသူများအတွက် ထားသည့် ဘုန်းကြီးကျောင်း တဖြစ်လဲ ကယ်ဆယ်ရေး ဂေဟာ၌ နေထိုင်နေသူ ဖြစ်သည်။

အိမ်နီးချင်းတဦး၏ ကောင်းမှုကြောင့် ၇ ပေ မြင့်သည့် ဒီရေလှိုင်းဒဏ်မှ သီသီကလေး လွတ်မြောက်လာခဲ့သည့် ဒေါ်ဖွားစိန်သည် ယခု သူမနေသည့် ကွမ်းခြံကုန်း ဘုန်းကြီးကျောင်း အနားရှိ ရေကန်သို့ သွားရန်ပင် ကြောက်နေရှာသည်။ ကွမ်းခြံကုန်းသည် ရန်ကုန်မြို့မှ ၃၅ မိုင်ခန့် အကွာတွင် တည်ရှိသည်။
သူတို့ ကောင်းကောင်း အိပ်မရကြောင်း အသက်မသေ လွတ်မြောက်ခဲ့သူ အများအပြားက မဇ္ဈိမကို ပြောပြပါသည်။ ကလေးများဆိုလျှင် ညဘက်များ၌ ယောင်ယမ်း အော်လေ့ ရှိသည်ဟု ဆိုသည်။

“အဲဒီလို ဖြစ်နေတော့ နောက်နေ့မနက်ဆို ဒီကလေးတွေ ပန်းပြီး ယဲ့ယဲ့ပဲ ကျန်တော့တာပေါ့။ အဲဒီလို ပင်ပန်းပြီး အားနည်းလေ၊ သူတို့ အားနည်းလေ ဖြစ်တာပေါ့” ဟု မုန်တိုင်းဒဏ် အဆိုးဝါးဆုံး ခံခဲ့ရသည့် ဒေသတခုဖြစ်သည့် ဘိုကလေးမြို့မှ ဆရာဝန်တဦးက ဆိုပါသည်။ “အဲဒီတော့ ဒီကလေးတွေမှာ ကာလ ဝမ်းရောဂါလို၊ ဝမ်းလျှောဝမ်းပျက် ရောဂါလို ကပ်ရောဂါတွေ ဖြစ်ဘို့ ပိုများတာပေါ့”။

ကွမ်းခြံကုန်းမြို့သို့ ဆန်နှင့် အဝတ်အစားများ လှူဒါန်းရန် သွားရောက်ခဲ့သည့် ရန်ကုန်သားတဦးက သူထိုမြို့တွင် လမ်းပေါ်၌ ထူးခြားစွာ သွားလာ လှုပ်ရှားနေကြသည့် မုန်တိုင်းဘေးမှ လွတ်မြောက်ခဲ့သူများကို တွေ့ခဲ့ရသည်ဟု ဆိုသည်။

ခန္ဓာကိုယ်ပေါ်တွင် နနွင်းများ လိမ်းကြံထား၍ မီးတွင်းမှ ထွက်ခါစ အမျိုးသမီးတဦးသည် သူ့သား ၂ ဦး၏ အမည်များကို အော်ဟစ် ခေါ်နေသည်ကို တွေ့ခဲ့ရသည်။

အလားတူပင် “ရေတွေ လာနေပြီ” ဟု အော်ရင်း လမ်းပေါ်တွင် ပြေးလွှားသွားနေသူ အမျိုးသားတဦးကိုလည်း တွေ့ခဲ့ရသည်။ သို့သော် မည်သည့်ရေမျှ တက်လာနေခြင်း မရှိ။ နောက်အမျိုးသားတဦးက တိုင်တလုံးကို ဖက်တက်ရင်း “တိုင်ပေါ်တက်နိုင်ရင် ရေဘေးက လွတ်တာပဲကွ” ဟု ပြောနေသည်။

မုန်တိုင်းတွင် မိသားစုများ အိုးအိမ်များ ဆုံးရှုံး၍ ဘဝ ပျက်ခဲ့ရသူများ၏ စိတ်ကျန်းမာရေး ပြဿနာများကို ကုစားနိုင်ရန် လပေါင်း အတော်ကြာ အချိန်ယူရဦးမည်ဟု ရန်ကုန်မြို့တွင် ကိုယ်ပိုင် ဆေးကုခန်း ဖွင့်လှစ်ထားသည့် စိတ်ပညာရှင်တဦးက ပြောကြားသွားပါသည်။ ကပ်ဘေး စီမံခန့်ခွဲမှုတွင် မြန်မာ အစိုးရသည် အသိပညာနှင့် အတွေ့အကြုံ ချို့တဲ့ပြီး၊ အချို့သော ပြဿနာများမှာမူ နိုင်ငံတကာ အကူအညီပေးရေး ကျွမ်းကျင်သူများကို ဝင်ခွင့်ပြုလိုက်ရုံနှင့် ကိုင်တွယ်ဖြေရှင်း သွားနိုင်သည်ဟုလည်း သူက ဆိုလိုက်ပါသည်။

ဟိုင်းကြီးကျွန်းမှ အသက်မသေ ကျန်ရစ်ခဲ့သူ တဦးကလည်း သူ့အကိုသည် ထမင်းလည်းမစား၊ စကားလဲ မပြောဘဲ ငူငူကြီးသာ ထိုင်နေသည်ဟု ဆိုသည်။ အဆိုပါ သူ့အကိုသည် လေဘေးတွင် ကျပ်ငွေ တသန်းခန့် တန်သော ငါးဖမ်းလှေ နှင့် အိမ်ကို ဆုံးရှုံးခဲ့ရသူ ဖြစ်သည်။

“ကျနော့်အကိုက ပုံမှန် မဟုတ်တော့ဘူးဗျ။ သူ့မျက်လုံးတွေက တွေတွေကြီး ဖြစ်နေတာ။ ဘာမှလည်း မပြောဘူး၊ ဘာမှလည်း မေးလို့ မရတော့ဘူး” ဟု သူက ဆိုပါသည်။

၂ဝဝ၄ ခုနှစ် ဆူနာမီ ရေလှိုင်းကြီး ရိုက်ခတ်အပြီး ထိုင်းနိုင်ငံ တောင်ပိုင်းတွင် ဖွင့်လှစ်ခဲ့သလို ယခုကဲ့သို့ မုန်တိုင်းကြောင့် တုန်လှုပ်ခြောက်ခြား ကျန်ရစ်ခဲ့သူများအတွက် စိတ်သောက လျော့ပါးရေးစခန်းများ ဖွင့်လှစ်ပေးသင့်သည် ဟု အန်ဂျီအို တခုမှ ကျွမ်းကျင်သူတဦးက ပြောကြားသွားပါသည်။ အဆိုပါ စခန်းများတွင် အသက်မသေ ကျန်ခဲ့သူများကို ဆေးကုသမှု ခံယူစေရင်း အသက်မွေးဝမ်းကျောင်းနှင့် ကျွမ်းကျင်မှု ပညာရပ် အသစ်များကို သင်ကြားပေးသည်။ ဤသို့ဖြင့် ဝင်ငွေလည်း ရရှိလာပြီး မိသားစုကိုလည်း ထောက်ပံ့လာနိုင်သည်။

“သူတို့ကို လျစ်လျူရှု ပစ်ထားလိုက်လို့ အခြေအနေတွေ ပိုဆိုးသွားရင် နောင်မှာ ကျနော်တို့ နောင်တ ရနေရမယ်” ဟု အမည်မဖေါ်လိုသူ အဆိုပါ ကျွမ်းကျင်သူက ပြောဆိုသွားပါသည်။

အသက် ၃ဝ အရွယ် ကွမ်းခြံကုန်း မြို့သားတဦးက မုန်တိုင်းအတွင်း သူ့မိန်းမကို သေဆုံးစေခဲ့သည့် လဲကျနေသော သစ်ပင်ကြီးကို ကြည့်ရင်း ငိုနေသော သူ့ကလေးကို ချော့နေသည်။

“မငိုပါနဲ့ ကလေးရယ်၊ မေမေက သားကို နို့တိုက်ဖို့ ပြန်လာမှာပါ၊ အဖေလဲ မင်းအမေ ပြန်လာတာကို စောင့်နေတာပါပဲ” ဟု ရေရွတ်နေသည်။


မင်းခက်မောင်