ရွှေဝါရောင်တော်လှန်ရေး

ဒေါ်စု ကျေညာချက်ကို ဆန့်ကျင်ရန် နအဖ မှ ငြိမ်းများကို ဖိအားပေး
မျိုးကြီး
Friday, 16 November 2007 19:05 - မြန်မာစံတော်ချိန်
ရှမ်းပြည် (မြောက်ပိုင်း)ရှိ အပစ်အခတ်ရပ် တိုင်းရင်းသား လက်နက်ကိုင်အဖွဲ့ ၂ ဖွဲ့ကို ယဉ်ကျေးမှု ဝန်ကြီးက ယနေ့တွင် ခေါ်ယူတွေ့ဆုံကာ ဒေါ်အောင်ဆန်းစုကြည်၏ ကျေညာချက်ကို သဘောမတူကြောင်း လက်မှတ် ထိုးခိုင်းခဲ့သည်။
ယဉ်ကျေးမှုဝန်ကြီး ဗိုလ်ချုပ် ခင်အောင်မြင့်က ကချင်ပြည် လွတ်လပ်ရေး တပ်မတော် (KIA) နှင့် ကချင် ဒီမိုကရေစီသစ် တပ်မတော် (NDAK) တို့မှ ကိုယ်စားလှယ်များကို ဝန်ကြီးက မြစ်ကြီးနားသို့ ခေါ်ယူတွေ့ဆုံကာ လက်မှတ် ရေးထိုးခိုင်းခြင်း ဖြစ်သည်။
နိုဝင်ဘာလ ၁၄ ရက်နေ့ကလည်း ဝန်ကြီးက ဝ’ ပြည် သွေးစည်း ညီညွတ်ရေး ပါတီ (UWSA) မှ ဦးလျောက်မီလျံနှင့် ဦးအောင်မြင့်၊ ရှမ်းပြည်တပ်မတော် (မြောက်ပိုင်း) SSA (N) မှ ဦးကိုင်ဖ၊ ကိုးကန့်အဖွဲ့မှ ဦးဖုန်ကျားဖူး၊ ကချင် ကာကွယ်ရေး တပ်မတော် (KDA) မှ ဦးမထုနော်တို့ကို လားရှိုးသို့ ခေါ်ယူတွေ့ဆုံခဲ့သည်။
ကချင်ကာကွယ်ရေး တပ်မတော် (KDA) မှ ဦးမထုနော်သာလျှင် ချက်ခြင်း လက်မှတ်ရေးထိုး ပေးခဲ့သော်လည်း ကျန်အဖွဲ့ ၃ ဖွဲ့က အဖွဲ့အတွင်း အစည်းအဝေးနှင့် ဆုံးဖြတ်ပြီးမှသာ အကြောင်းပြန်မည်ဟု နအဖ ဝန်ကြီးကို ပြောဆိုခဲ့သည်။
ကိုးကန့် ဒီမိုကရေစီနှင့် ညီညွတ်ရေးပါတီ၊ ပြည်ထောင်စု မြန်မာနိုင်ငံတော် လားဟူအမျိုးသား ဖွံ့ဖြိုး တိုးတက်ရေး ပါတီ၊ မြို (ခေါ်) ခမိ အမျိုးသား ညီညွတ်ရေးအဖွဲ့၊ ရှမ်းပြည်မြောက်ပိုင်း အထူးဒေသ ၃ SSA၊ ကချင် တိုင်းရင်းသားများ တိုးတက်ရေးနှင့် လုံခြုံရေး တပ်မတော်နှင့် ကရင်နီပြည် လူမျိုးပေါင်းစုံ ပြည်သူ့ လွတ်မြောက်ရေး တပ်ဦးတို့ကလည်း အလားတူ ကျေညာချက်များ ထုတ်ပြန်ခဲ့ကြသည်။
ယခုလ ၁၄ ရက်နှင့် ၁၅ ရက်နေ့များတွင်လည်း ပြည်ထောင်စု ပအိုဝ်း အမျိုးသားအဖွဲ့ချုပ်၊ ပအိုဝ်း အမျိုးသား အဖွဲ့ချုပ်၊ တိုင်းရင်းသား စည်းလုံးညီညွတ်ရေးပါတီ၊ ရှမ်းပြည် ကိုးကန့် ဒီမိုကရက်တစ်ပါတီ၊ ဝ’ အမျိုးသား ဖွံ့ဖြိုး တိုးတက်ရေးပါတီ၊ တိုးတက်သော ဗုဒ္ဓဘာသာ ကရင် အမျိုးသား အစည်းအရုံး (DKBA) နှင့် ကယန်းအမျိုးသား ကာကွယ်ရေး တပ်တို့ကလည်း ဒေါ်အောင်ဆန်းစုကြည်၏ ကျေညာချက်ကို ကန့်ကွက်ခဲ့ကြသည်။
သူတို့၏ ကြေညာချက်များက တိုင်းရင်းသားများကို ဒေါ်အောင်ဆန်းစုကြည်မှ ကိုယ်စားပြုမည် ဆိုသည့်အချက်ကို ဆန့်ကျင်လိုက်ခြင်း ဖြစ်ပြီး နအဖ ၏ မူဝါဒလမ်းစဉ် ၇ ရပ် (လမ်းပြမြေပုံ) ကို အလေးအနက် ထောက်ခံသည်ဟု ဖော်ပြကြသည်။
သို့သော်လည်း စစ်အစိုးရ ဖိအားပေးမှုကြောင့် ယခုလို ကျေညာချက်မျိုး ထုတ်ပြန်ရခြင်း ဖြစ်သည်ဟု တိုင်းရင်းသား အဖွဲ့များက ထုတ်ဖော် ပြောဆိုကြသည်။